لا للحرية والعدالة ...... لا لحزب السلام ...... اذا ......

السلام عليكم ورحمة الله وبركاته

اولا اعتذر عنوان موضوعى لانصار الحرية والعدالة وانصار السلام

بس ان شاء الله موضوعى مش هيكون فيه اساءة لاحد على الاطلاق

من متابعتى لحال البلد الايام اللى فاتت دى حسيت اننا بنفكر غلط بالنسبة للانتخابات ....... احنا لسه بنفكر بتفكير زمان ونظام الانتخابات القديم وبتفكيرنا ده هندخل البلد فى مشاكل وانقسامات واحنا مش نقصين فرقة

طبعا كلنا لازم نفرح بوجود اتنين مرشحين من بلدنا وده فى نظام الانتخابات القديم كان مستحيل

بس فى نظام الانتخابات الجديد (( نظام القائمة )) فالتنافس بين مرشحين بلدنا مش تنافس شخصى بين الاتنين هو تنافس حزبى بين حزبين

يعنى اللى يتكلم ويقول اختاروا فلان عشان هو الافضل والاحق يبقى بيضحك على نفسه وعلى الناس

لان صوتى فى الانتخابات لابن بلدى هيفيده بنسبة 1% على اعلى تقدير وده مبالغ فيه كمان

انما باقى ال 99 % فهى راحة للحزب والناس اللى بتسبق مرشح بلدنا فى القائمة

يعنى بلاش نخلى الدعاية شخصية بحتة فى بلدنا ونصنع بايدينا منافسة مش موجودة بمعنى المنافسة بين الاستاذ / عطا المكاوى مرشح الحرية والعدالة والاستاذ / كامل محمد كمال مرشح حزب السلام لان ده اكبر غلط

المنافسة الموجودة بين حزبين الحرية والعدالة & السلام مش بين عطا وكامل مع الاحتفاظ بالالقاب

يعنى للامانة والمصداقية اللى يتكلم عن الانتخابات ميقولش انتخب كامل او عطا عشان ده فيه او ده فيه انما الصح انه يقول حزب كذا فيه وحزب كذا فيه وبلاش نضحك على الناس

ياريت المقصود من كلامىيفهم لكل واحد صح وملقيش خطيب فى صلاة الجمعة تانى مع انه مذكرش اسماء حد بس قال انتخبوا الاصلح من الاتنين وصاحب الخلق اللى هيفيدنا وانا مش مع ده ولا ده بس صوتك امانة للاحق والاصلح

فوقوا بقا الانتخابات بنظام القوائم

يعنى صوتى للحزب اولا واخيرا وبعد حسابات معقدة ممكن ينفع ابن بلدى
وعلى فكرة عمر بلدنا الصغيرة دى ما هتاثر فى الانتخابات

ياريت الناس بتوع الانتخابات سواء انصار الحرية والعدالة او انصار السلام او اى حد جديد يطلعلنا تانى يعرفوا ويفهموا الناس كده عشان ميعملوش فرقة فى بلدنا الجميلة الصغيرة اللى فعلا مش هتاثر باى حال على سير الانتخابات

لو بتحبوا بلدنا (( كفر نعمان )) بجد يبقى بلاش نحصر الانتخابات والعداوة فى بلدنا

معلومة للى يقدرها ويفهمها

اجمالى اصوات دايرتنا :- 471528 صوت

منهم فى كفر نعمان بالكتير قوى :- الف صوت بس

ياترى فهمتوا قصدى

اترككم فى رعاية الله
واتمنى من كل قلبى نفضل نحب بعض ومصلحتنا واحدة

امضاء

انا بحب بلدى واهل بلدى

السلام عليكم
اولا وقبل اى شىء
برحب بيك اخى الكريم
بيننا عضو من اعضائنا
واخ لنا فى اسرتنا المتوضعه
مع تمنياتى ان نستفيد منك
وتستفيد منا
اما عن موضوعك
فهو رئيك ولك فيه الحريه كامله
تعبر عنه كيفما تشاء
ولكن لا تقلق يا اخى
القريه لن تنقسم
وما حدث فيها من قبل دليل على ذالك
بعد الانتخابات تعود كل شىء لما كان عليه

هاكذا هى كفر نعمان
لا يحملون كرها ولا ضغينه
ولكن من حقنا ان نامل فى وجود مرش من قريتنا
ولا ايه
ويكون من ابنائها عضو لمجلس الشعب

طبعا بنتمنى كلنا يكون فيه نائب من بلدنا

عشان يخدمنا وحتى الشباب بما فيهم انا يلاقى وظيفة محترمة

بس رايى انا مقتنع بيه جدا وخايف على بلدنا من الانقسامات وبدات تحصل فعلا على ارض الواقع

وبعد الانتخابات كل حاجة هترجع طبيعتها بس النفوس شايلة من بعضها

وشكرا لترحيبك بيا

فى امان الله

أنا معاك في هذا الرأي
وأحترم وجهة نظرك جدااا
فنحن نحكم على الحزب و برنامجه وأهدافه والشخصية التي قام بترشيحها
لذلك أظن أن حزب الحرية والعدالة أقام العديد من المؤتمرات التي تحدث
فيها عن الحزب و أهدافه و برنامجه واذا أردت المزيد فموقع الحزب
على النت عليه كل ما تسأل عنه ولهذا أرجوا أن تراجع كتابة عنوان الموضوع
و جعله لا للأشخاص ونعم للحزب الافضل الذي يمثلنا في البرلمان
والله الموفق

بسم الله الرحمن الرحيم

أخي العزيز البيحب بلده وأهل بلده

اتفق معك في شئ وأختلف في أشياء

اتفق معك علي أن المنافسة بين حزبين وليست بين شخصين

وأختلف معك في
أن بلدنا لن ت}ثر في الإنتخابات لأن الصوت الواحد ممكن يفرق
الشئ التاني لو أي حزب أخذ نسبة ينعكس ذالك علي عدد أعضائه ال هيدخلوا مجلس الشعب
والأستاذ عطا رقم 4 في القائمة يعني لو حزب الحريه والعدالة أخذ نسبة 50% من الأصوات علي مستوي الدائرة تكون هناك فرصة كبيرة جدا لدخول الأستاذ عطا وان شاء الله ممكن ذالك يتحقق لأن أنصار هذا الحزب وشهرته أكبر من شهرة وأنصار حزب السلام أما الأستاذ كامل والأستاذ عطا كأشخاص فهم ناس محترمين وكلهم اخواتنا وأبناء بلدنا ولافرق بينهم في الأدب والإحترام

اخى العزيز محمود السويفى

انا كمان بحترم كلامك جدا بس انا مكنتش اقصد ان حد يعرفنى اهداف الحزب بتاعه

كل اللى انا اقصده من موضوعى انكم واقصد هنا (( الداعين للانتخابات ))

فى بلدنا بتبنوا الدعاية على المرشح الموجود اكتر من الحزب لكسب تعاطف الناس هنا بوجود مرشح البلد

واعتقد ان حضرتك متفق معايا فى رايي

بالنسبة لعنوان الموضوع انا اعتذرت فى البداية

بس انا هقول عنوانى كامل

لا للحرية والعدالة ولا لحزب السلام اذا كانوا هيصنعوا الفرقة والضغينة فى بلدنا

دى وجهة نظرى الشخصية مش اكتر

واسال الله الخير لبلدنا

اخى الفاضل ابو نجا

كويس ان حضرتك متفق معايا فى النقطة دى

وبتمنى تنفيذها على ارض الواقع

ومش عيب انك تبين مميزات مرشحك على الاطلاق بس انا اقصد ان ده مش الاساس

الاساس هو اعرف الناس بالحزب ومبادئ الحزب

والمعادلة بسيطة جدا وهتبين بلدنا هناثر ولا لا

اجمالى اصوات دايرتنا :- 471528 صوت

منهم فى كفر نعمان بالكتير قوى :- الف صوت بس

ده هو تاثير بلدنا على الانتخابات

كنت اتمنى تكتب اسمى زى ما هو مكتوب مش تقولى ياللى بتحب بلدك

انا اسمى

انا بحب بلدى واهل بلدى

ياريت كلنا نرددها ونحسها من قلبنا

دمت فى امان الله

السلام عليكم
اخى الغالى
انا بحب بلدى واهل بلدى
كنا فى الانتخابات الفرديه
نجد 27الف صوت يعيد مع 4500صوت نقول
طيب ازى يا جماعه
يقولو لينا اصلومكملش 50\ زائد واحد
ازن الصوت الوحد بيكون فيصل وبيفرق كتير
مش قريه باكملها مش هتاثر
ممكن فى القائمه النسبيه
الفرد ياثر على كماله الوحد بالميهوالوحد بالميه ده
ممكن يحرم حزب من كرسى زياده
ولا ايه
ثم اخى الفاضل
شباب بلدنا ليه تاثير وانتشار فى القرى المجاوره
يعنى ممكن يزيدو من خلاال هذا
والا مكنش مرتضى منصور
وعبد الرحمن بركه تنازعو على ارضها
عرفها وعرف اهميتها اعضاء ترشح ومارسو الحياه السياسيه وخاضو فيها كثير من المعارك
فكيف نجهل نحن اهميتها

السلام عليكم اولا
اهلا بالعضو الجديد انا بحب بلدى واهل بلدى
ويارب نستفيد بمواضيعك دايما
ثانيا
انا اتفق معاك فى الراى
ياريت اللى يصوت يبقى بضمير للحزب الاصلح
ثالثا
للاخ ابو نجا مش بالكترة بل بالاصلح
على سبيل ابسط مثال انا ممكن اشترى بربع جنيه لب ويكونوا شوية كتير
وممكن اشترى بنص جنيه لب ويكونوا شويه صغيرين بس افضل من ابو جنيه
مش بالاكتر يا اخى
وبعدين انا مش شايف فى حزب الحريه والعداله اى منفعه للبلد
لانه حزب ينفع نفسه فقط ومش هيفيدنا
بس ربنا اعلم بينا وهيحمينا
واخيرا سلامى للجميع

والله يا اخى لقد علمت فى وقت جهل فيه المتعصبون

عندك حق اخى وعد الحب

اهلا بك اخى الفاضل
مع انى مش من اهل هذه القريه
لاكنى اتفق معك فى كلامك على العموم
لك تحياتى وتقبل مرورى

ابوغادة

شايف انك رديت قبل كده وكنت متفق معايا فى كل شئ

ومعلقتش على كلمتى الا بعد رد ابونجا

بصراحة شايفها مساندة وبس لراى ابونجا

وردى عليك ان نظام الانتخابات مختلف وبرده مهما كان فتاثير بلدنا مش هيبقى مستاهل الفرقة

الفرقة اللى بتزيد يوم عن يوم وبلاش كلام معسول لازم نتكلم بصراحة

امير البحار

اهلا بيك امير متشكر اوى لكلامك

بس ليا رجاء عندك مفيش مشكلة اننا نختلف

وتعترض وتبين وجهة نظرك بس باسلوب راقى مش باسلوب ...........

دى ملاحظة بسيطة اوعى تزعل منى

وعد الحب

خير الكلام ماقل ودل كلمتك لها معانى كتير

ممكن كل واحد يفهمها على حسب تفكيره وتوجهاته

شكرا ليك اخى

بحر بلا مرسا

اهلا بك ومتشكر على موافقتى فى الراى

ولك تحياتى ايضا

وتستفيد منا
اما عن موضوعك
فهو رئيك ولك فيه الحريه كامله
تعبر عنه كيفما تشاء
ولكن لا تقلق يا اخى
القريه لن تنقسم
وما حدث فيها من قبل دليل على ذالك
بعد الانتخابات تعود كل شىء لما كان عليه

هاكذا هى كفر نعمان
لا يحملون كرها ولا ضغينه
ولكن من حقنا ان نامل فى وجود مرش من قريتنا
ولا ايه
ويكون من ابنائها عضو لمجلس الشعب

اخى بحب بلدى واهل بلدى موضوعك قمة فى الرقى الفكرى ورساله قوية وواضحة ولكن لا تغضب لو قلت ان الموضوع مثل غريق يلاطم الامواج كل ما يطلبه او يامله هو الوصول الى بر الامان ولكن للاسف لا يعرف السباحة فكيف ينجو. اقصد بضرب المثل هذا ان كلا من انصار الحزبين سيتفق معك ولكن له ملحوظه يريد ان يوضح فيها وجهه نظره فى دعم حزبه وهنا الازدواجيه فكيف يتفق فى موضوعك وكيف يبحث عن مبررات فى دعم المرشح او الحزب دعونا نتعلم كيف نختلف ولكن فى النهاية نحن ابناء بلد واحد

ابوغادة

انا مكنتش اقصد انك متفق معايا فى كل شئ

كنت اقصد انك اتفقت معايا فى نقطة تاثير البلد على الانتخابات

وده ان مكنش بالفاظ واضحة وصريحة يبقى بعدم الاعتراض على النقطة دى

خطى الحبيب

كلامك جميل ومتفق معاك انى بلاطم الامواج

واكيد انى مبعرفش السباحة كمان ودى حقيقة

بس انا واحد بيحب بلده بجد وميهموش ده او ده

ويزعلنى جدا اشوف ولاد بلدى مختلفين اختلاف يصل للشجار حتى لو بالكلمات عشان احزاب

ومهما كان الحزب ورسالته وبرنامجه فهو بيدور على مصلحته

بس يهمنا اللى يفيدنا ويخدمنا

حياتى لكل محب لبلده

انا بحب بلدى واهل بلدى

أخي العزيز اسمح لي
اصرارك علي أن البلد ملهاش لازمه في الإنتخابات غيرمبرر ودعوة للسلبية
وأن المنافسة في الإنتخابات لازم لها من الفرقه ولما لانتنافس منافسة شريفه ندعو الله أن يولي من يُصلح
وياريت مش عايزين نغني ونرد علي بعض زي ما أنا شايف من بعض الردود وتوضيح لمن لبس عليه الأمر نحن نتفق معك أخي في أنه لاداعي للفرقه لكنني لست معك في العودة للسلبية ولكن نتعلم كيف نتنافس وكيف نختلف مع احترام كل منا للأخرفي ظل الحب في الله ومصلحة البلد
دمتم بخير

اسمحلى ابو نجا

انا مش بدعوا للسلبية ابدا شكلك فهمتنى غلط

انا اقصد ان اصوات البلد متستاهلش الفرقة

وانا مش مصمم ان الانتخابات لازم تصنع فرقة ولا حاجة ابدا وبتمنى ده ميحصلش

بس من غير كلام دبلوماسى ولا كلام اغانى زى ما انت وصفت بعض الردود

الانتخابات عامله فرقة وخايف انها تتطور لعداوة

واكبر دليل ردودك على بعض الاعضاء بكامة (( الحزب بتاعكم ولو الحزب بتاعكم كان عمل ))

احزاب ايه اللى هتخلي الناس تخسر بعض فوقوا يا بتوع السياسة كلامى مش موجه ليك لوحدك

بتمنى ننفذ اللى احنا بنكتبه هنا

وبلاش حتة نغنى على بعض فى الردود دى لانك اكتر واحد رادد او مفيش حد رد اكتر منك

انا بحب بلدى واهل بلدى

» معاقبة مدرسة وضعت موضوع التعبير تهنئة للحرية والعدالة بالفوز فى الانتخابات
» لماذ أنتخب الحرية والعدالة
» فوز الحرية والعدالة بمقاعد الدقهلية
» الحرية والعدالة' يجدد رفضه لوثيقة 'السلمى'
» السلام فى الاسلام